МОЛИТВА КО ГОСПОДУ И СВЯТЫМ О ПУТЕШЕСТВУЮЩИХ.

Тропарь, глас 2

Путь и истина сый, Христе, спутника Ангела Твоего рабом Твоим ныне, якоже Товии¹ иногда, посли сохраняюща, и невредимых, к славе Твоей, от всякаго зла во всяком благополучии соблюдающа, молитвами Богородицы, Едине Человеколюбце.

Кондак, глас 2

Луце и Клеопе во Еммаус спутешествовавый², Спасе, сшествуй и ныне рабом Твоим, путешествовати хотящим, от всякаго избавляя их злаго обстояния: вся бо Ты, яко Человеколюбец, можеши хотяй.

Молитва ко Господу

Господи Иисусе Христе Боже наш, истинный и живый путю, состранствовати мнимому Твоему отцу Иосифу и Пречистей Ти Деве Матери во Египет изволивый³, и Луце и Клеопе во Еммаус спутешествовавый! И ныне смиренно молим Тя, Владыко Пресвятый, и рабом Твоим сим Твоею благодатию спутешествуй. И якоже рабу Твоему Товии, Ангела хранителя и наставника посли, сохраняюща и избавляюща их от всякаго злаго обстояния видимых и невидимых врагов, и ко исполнению заповедей Твоих наставляюща, мирно же и благополучно и здраво препровождающа, и паки цело и безмятежно возвращающа; и даждь им все благое свое намерение ко благоугождению Твоему благополучно в славу Твою исполнити. Твое бо есть, еже миловати и спасати нас, и Тебе славу возсылаем со Безначальным Твоим Отцем и со Пресвятым и Благим и Животворящим Твоим Духом, ныне и присно и во веки веков.

Аминь.

Молитва перед отправлением в воздушное путешествие

Владыко Господи Иисусе Христе, Боже наш, стихиям повелеваяй и вся горстию содержай, Его же бездны трепещут и Ему же звезды присутствуют. Вся тварь Тебе служит, вся послушают, вся Тебе повинуются. Вся можеши, сего ради вся милуеши, Преблагий Господи! Тако и ныне убо, Владыко, нас, рабов Твоих (имена), моления теплые приемля, благослови путь и воздушное шествие, запрещая же бурям и ветром противным и лодию воздушную целу и невредиму соблюдая. Спасительное и небурное по воздуху превождение нам даруй и благое намерение совершившим нам весело во здравии и в мире возвратитися благоизволи. Ты бо еси Спас и Избавитель и всех благих небесных и земных Податель, и Тебе славу возсылаем со Безначальным Твоим Отцем и Пресвятым и Благим и Животворящим Твоим Духом ныне и присно и во веки веков. Аминь.

Молитва Богородице

Заступница усердная, Мати Господа Вышняго! Ты еси всем xристианом помощь и заступление, паче же в бедах сущим. Призри ныне с высоты святыя Твоея и на ны, с верою покланяющияся пречистому образу Твоему, и яви, молим Тя, скорую помощь Твою по морю плавающим и от ветров бурных тяжкия скорби терпящим. Подвигни и вся православныя христианы на спасение в водах утопающих, и воздаждь подвизающимся о сем богатыя милости и щедроты Твоя. Се бо, на образ Твой взирающе, Тебе, яко милостивно сущей с нами, приносим смиренная моления наша. Не имамы бо ни иныя помощи, ни инаго предстательства, ни утешения, токмо Тебе, о Мати всех скорбящих и напаствуемых. Ты по Бозе наша Надежда и Заступница, и на Тя уповающе, сами себе, и друг друга, и весь живот наш Тебе предаем во веки веков. Аминь.

Молитва Николаю Чудотворцу

Святой Николай Чудотворец! Мы помним и чтим силу твоей веры, явленную во время твоего паломничества в Иерусалим. Тогда ты в ответ на мольбы корабельщиков укротил бурю, предсказанную тобой, и спас многие души. И стало это чудо свидетельством твоей великой веры в Иисуса Христа и памятью о Спасителе, прекратившем бурю на море Галилейском. Да будем причастны твоим благословением силе твоей веры, и последуем твоему примеру как истинному упованию на Господа. Веруем во Единого Бога Отца и Сына и Святого Духа, и твое милосердное заступничество за нас.

Молитва святителю Николаю

О, всесвятый Николае, угодниче преизрядный Господень, теплый наш заступниче, и везде в скорбех скорый помощниче! Помози мне грешному и унылому в настоящем сем житии, умоли Господа Бога даровати ми оставление всех моих грехов, елико согреших от юности моея, во всем житии моем, делом, словом, помышлением и всеми моими чувствы; и во исходе души моея помози ми окаянному, умоли Господа Бога, всея твари Содетеля, избавити мя воздушных мытарств и вечного мучения: да всегда прославляю Отца и Сына и Святаго Духа, и твое милостивное предстательство, ныне и присно и во веки веков. Аминь.